【白宮又淪陷】《白宮淪陷3》片尾彩蛋見父子情 三部曲完滿結束
美國總統可以三次差啲畀恐怖份子暗殺，睇怕美國CIA都幾弱雞下。
一堆荷李活鉅製嘅題材關於特工同間諜，最新嘅特工題材嘅作品係《白宮淪陷3：天使淪陷》，由謝拉畢拿、摩根費曼主演。今次故事講述美國總統畀無人機襲擊而昏迷，除左保鑣之外其他隨行人員都死晒。曾經係特工嘅保鑣謝拉畢拿畀FBI追捕，佢惟有一邊着草一邊調查真相。就連黑幫都落埋江湖追殺令，實行警黑合作。其實《白宮淪陷》系列，三集之間有唔少情節都係互相呼應，入場嘅時候可以留意下。
1.摩根費曼紥職做總統
網上圖片
《白宮淪陷》今次嚟到第三集，成部電影嘅班底都大換血，連電影公司都轉埋，只係得謝拉畢拿同摩根費曼做足三集。而摩根費曼飾演嘅Allan Trumbull，由眾議院院長、副總統到坐正做埋美國總統，政治生涯平步青雲。
2.謝拉畢拿又扮特工 落力操肌兼做埋監製
網上圖片
謝拉畢拿自從《戰狼300》之後就再冇代表作，之後終於靠《白宮淪陷》系列彈返起，今次嚟到第三集當然不容有失。謝拉畢拿開拍之前操定肌，以至FIT狀態上陣演出。今次謝畢拿唔單止落場做戲，仲做埋電影監製務求呈現最高質作品畀觀眾欣賞，有傳指佢改左十五次劇本，力臻完美。
3.片尾彩蛋別具新意
網上圖片
今次《白宮淪陷3》都順應潮流加片尾彩蛋，但就唔係為下集留伏線鋪路。彩蛋講述Mike同老竇Nick一齊去漂浮館，克服腦震盪後遺症，兩仔爺一齊去玩收返過去集數嘅親情線，雖然對白簡單日常，但都成為成套戲嘅一大焦點，如有睇前兩集嘅話一定明。今次彩蛋算係完善返成個系列嘅劇情，填補返空白嘅親情關係，似係同影迷告別。謝拉畢拿早前喺其他訪問都表示，希望第三集係全列嘅最後一集，認為故事已經有完美結局。
