• U生活

【我和我的祖國】惠英紅和任達華的愛國心

2019年09月25日 12:51 am

Leng Zai @ UPower

愛國大過天，十月一日中港同步開畫。

最近慶祝中華人民共和國建七十周嘅電影《我和我的祖國》就正式出左預告，咁其中一個單元《回歸》就係由香港代表惠英紅同任達華主演，佢地喺呢部戲嘅花絮就分享佢地嘅愛國心路歷程。

先講左任達華先，雖然佢早前喺中山畀某個中國人插左一刀，但係冇損佢嘅愛國心，最近密密上祖國接Job之餘仲拍埋呢部《我和我的祖國》。佢喺呢部嘅花絮訪問就以父母比喻中國，仲話如果冇「父母」嘅話，香港基建唔會做得咁好。

仲有任達華提到當年交接儀式嘅時候，佢係?實部電視，仲睇到流晒眼淚，同電影嘅情節一樣。華哥仲話，全世界嘅中國人都應該心連心。

至於小紅姐就喺訪問入面提到自己永遠都係中國人，佢話以前喺灣仔嘅時候有好多鬼佬，佢仲成日畀啲鬼佬恰。咁回歸就一定係最好，佢形容係「回到自己的家鄉」。

其實早前惠英紅接受個中國嘅節目講過，佢自己初戀就正正係一個去灣仔蒲嘅美軍，當年呢個美國人對住細細個嘅小紅姐，教佢點講廣東話「我愛你」，之後呢個美軍就去左越南。小紅姐因為呢句說話而畢生難忘，佢仲提到佢喺紐約攞獎嗰陣，專登搞場公開售票為美國老兵籌款，吸引左唔少老兵去睇。小紅姐仲周圍問人當年有冇去過灣仔，結果冇人去過。小紅姐表示佢搞咁多嘢，無非都係想知道當年同佢表白嘅美軍究竟過得好唔好，佢希望呢個美軍冇喺越南畀人打死，有一日可以寄封信畀佢報下平安都好。

但估唔到拍呢部《我和我的祖國》會令小紅姐忘記佢嘅初戀情人。

無獨有偶，小紅姐同華哥都喺微博share同一條由中國人民網嘅post，內容係：「#香港是中国的香港#，香港事务纯属中国内政，不容任何国家、组织或个人以任何方式干预。反对暴力，严惩暴徒，守护法治，珍惜安宁！ ​​​​」

而最盞鬼嘅地方係，小紅姐係冇喺FB提過呢部《我和我的祖國》、轉po任何愛國文章或者發表愛國言論。華哥早喺2012年之後就冇再用FB。