【Joker】五首電影配樂 小丑入魔之奏鳴曲
細細品味每一個音符的悲與喜~
《JOKER小丑》自上畫以嚟造成極大迴響，華堅馮力士飾演嘅Arthur Fleck，完美演繹葛咸城社會邊緣人。要建立小丑嘅瘋狂宇宙，除左出色嘅演技之外，仲要有經典嘅歌曲配樂先得，一齊欣賞下呢五首歌，話唔定可以更進一步了解小丑嘅內心世界。
網上圖片
1.〈Send In The Clown〉
〈Send In The Clown〉係美國劇作家Stephen Sondheim為音樂劇《小夜曲》而創作，係講錯失感情而覺得悔恨。歌詞不停提到「Clown」，其實係比喻自己嘅愚昧，而唔係指真正嘅小丑。
網上圖片
喺電影第一次出現呢首歌係Arthur喺地鐵遇到三個變態華爾街男人，佢地一邊哼住歌詞「Where are the clowns / There ought to be clowns」，一邊虐待Arthur，但就意外逼到小丑大開殺戒，可謂喚醒小丑嘅血色小夜曲。
2.〈Smile〉
Arthur經常失控狂笑，係因為佢個腦出問題，搞到成日係情緒波動或者太緊張嗰陣就病發喪笑。最攞命嘅係，佢阿媽仲要改名叫佢做Happy，由細細個開始就洗佢腦時刻都要笑，搞到病情仲嚴重。最後搞到凡係同笑相關嘅嘢都搞到佢勁大壓力。喺電影入面〈Smile〉仲要係喺佢楝篤笑表演失敗之先奏起，顯得格外殘忍。
網上圖片
喜劇大師差利卓別靈為左經典電影《摩登時代》而作〈Smile〉，《摩登時代》講到工階級面對經濟大蕭條同埋資本家剝削，都要保持微笑，表達面對逆境嘅精神。喺《JOKER小丑》入面，戲中嘅政商名流唔理出面群眾抗議，匿喺戲院睇《摩登時代》，相當諷刺。
3.〈That's Life〉
〈That's Life〉呢首歌講嘅係人生總有高低起跌，只要唔好放棄，總有一日會東山再起。喺電影入面，無論Arthur同阿媽跳舞、或者係殺死阿媽之後自己染小丑嘅綠頭髮。同埋最後喺精神病院同看更追逐，我地見到Arthur變成小丑之後嘅心境有咩變化，佢將自己人生變成喜劇，用小丑觀點令到成個世界更加「開心」。
4.〈Rock and Roll, Pt. 2〉
Arthur每次返屋企都要行勁長嘅樓梯，行親都好冇精神，但去到電影後段，佢以小丑嘅形像去梅利嘅清淡節目，落樓嗰陣神彩飛揚，行步路都有風。〈Rock and Roll, Pt. 2〉有「The 'Hey' Song」，而家歌曲嘅節奏又同華堅嘅舞步夾到不得了，成為成套戲其中一個最出色嘅場景之一。
網上圖片
不過，〈Rock and Roll, Pt. 2〉嘅作曲兼主唱Gary Glitter因為性侵小朋友而坐緊監，用呢首歌做配樂會令到佢有機會拎到極高額版稅，令到好多觀眾好唔滿意。
5.〈White Room〉
小丑喺節目殺死梅利之後，呢隻六十年代經典搖滾樂隊Cream嘅〈White Room〉隨即響起。呢首歌由Bass手Jack Bruce作曲，音樂詩人Pete Brown作詞，仲要有傳奇鼓手Ginger Baker同結他之神Eric Clapton嘅完美演奏，令首歌成為經典中嘅經典。
網上圖片
