【喪屍樂園】喪屍片歷年進化史 由暴力血腥到無厘頭搞笑
搞笑加喪屍係得嘅。
自電影發明以嚟，流行嘅片種一直都喺度改變，由以前興歌舞片、動作片。到近年超級英雄片大行其道，惟獨係喪屍片一直都歷久不衰，《喪屍樂園》（Zombieland）嚟到十年之後再推續集《喪屍樂園：連環屍殺》（Zombieland: Double Tap）。過左咁多年，喪屍片題材越嚟越多元化，除左一向主打血腥恐怖，亦都可以變成大眾主流、諷刺時弊，變得更有深度。
講起經典喪屍片，好多人都會諗起喪屍之父」佐治雷米路（George A Romero）喺六十年代編導經典之作《活死人之夜》（Night of the Living Dead），但其實喺1932年嘅《鬼影幢幢》（White Zombie）先係第一部喪屍片，呢部電影嘅主角卑拉洛高斯（Bela Lugosi）成為流行文化嘅icon，例如添布頓（Tim Burton）電影《艾活傳》（Ed Wood）都讚頌呢位「King of Horror」。卑拉主演過多部吸血殭屍電影，佢喺《鬼影幢幢》入面扮演巫師，用巫術整喪屍出嚟幫佢做嘢，呢部經典作開創喪屍片嘅先河，甚至影響埋音樂界，例如英國樂隊Bauhaus名曲《Bela Lugosi's Dead》就係以卑拉洛高斯為主角。
佐治雷米路的《活死人之夜》當然係喪屍片嘅里程碑，電影第一次引入喪屍咬人可以傳播病毒嘅概念，令到喪屍文化生生不息。佐治以十一萬美金拍成呢部電影，仲破格以黑人演員做主角，電影幕幕經典，由開場喪屍喺墳場返生到大屋困獸鬥好戲連場，有評論將呢部電影解讀為諷刺資本主義同埋隱喻黑人民權運動，表面係血腥暴力官能刺激，其實暗藏人性探討。近年《活死人之夜》仲有4K復修版本，美國公司The Criterion Collection都推出頂級藍光碟，足以證明呢部電影嘅歷史地位。
網上圖片
佐治喺兩年前已經過生，但係永遠都唔會動搖到佢係喪屍片之王嘅地位，佢生前一直都嘗試突破拍攝技術同劇本內容。喺1978年嘅《生人勿近》（Dawn of the Dead）就將喪屍片推向另一個高峰，利用逼真化妝技術，令到無數影迷睇得過癮，就連意大利cult片王盧西奧弗爾茲（Lucio Fulci）都拍左部戲挑機，喺1979年推出《生人迴避》（Zombie），一樣咁cult咁血腥，成為另一部經濟經典之作。《生人勿近》係佐治嘅另一部經典神作，喺2004年翻拍成《活死人凶間》，Netflix劇集《怪奇物語》（Stranger Things）第三季，同埋近期上畫嘅《喪屍樂園：連環屍殺》都有致敬《生人勿近》。
網上圖片
1985年嘅喪屍三部曲完結篇《喪屍出籠》（Day of the Dead）標誌住正式邁進喪屍片黃金期，好多佐治雷米奧嘅影迷為左追隨偶像仲落埋場做茄哩啡，片中大部喪屍係由影迷扮返。呢部作品最破格嘅地方係喪屍係有閱讀同學習能力，劇情都唔再係人類一直逃避喪屍追殺咁簡單。
網上圖片
佐治喺2005年出山再拍喪屍片《活死人地帶》（Land of the Dead），與時並進用埋CGI技術，講述喪屍大受壓逼，學識用槍反抗暴政。呢部電影用政府陰謀論包裝喪屍片，一如概往強烈諷刺時政，電影入面喪屍畀軍警當害蟲濫殺，搞到喪屍起義反抗，今時今日翻睇別具意義。
網上圖片
到左九十年代，唔少美國發行公司都想刀仔鋸大樹，投資拍左唔少恐怖cult片，例如老牌獨立電影Troma Entertainment就投資過《衰仔樂園》（South Park）創作人 Trey Parker成名前嘅自導自演之作《Cannibal! The Musical》。
網上圖片
2004年嘅《笑死人凶間》（Shaun of the Dead），以英式幽默重新定義喪屍片，帶嚟全新嘅「喪屍喜劇」（Zomedy）。去到2009年荷李活嘅《喪屍樂園》都有搞笑元素。2013年改編小說嘅《熱血喪男（Warm Bodies》仲致敬埋《生人迴避》，喪屍元素包裝青春故事，溝埋一樣咁好睇。
網上圖片
到左今年嘅喪屍片已經演變到變成全明星陣容演出，美國導演占渣木殊（Jim Jarmusch）嘅笑片《死無可死》（The Dead Don't Die），有標梅利（Bill Murray）同亞當戴華（Adam Driver）做差佬，泰達史雲頓（Tilda Swinton）做外星人、拎住武士刀嘅殯儀館老闆，仲有歌手Tom Waits做世外野人，電影充滿黑色幽默之餘仲諷刺埋現人沉淪物質主義。
網上圖片
喪屍同末世災劫對於創作人嚟講都有好大發揮空間，踏千禧年之後喪屍片越拍越大陣像，去到今時今日已經唔再係B movie 嘅專利。例如《迷幻列車》英國導演丹尼波爾（Danny Boyle）執導嘅《28日後》（28 Days Later），展現出末日氣氛，同年上畫嘅《生化危機》就一直拍左八集，口碑一集比一集差。去到2013年，巨星畢彼特監製兼主演《地球末日戰Z》（World War Z），投資兩億美金成本，打造無數喪攻城牆嘅震撼場面，原本計劃今年開拍續集，但又意外暫擱，睇嚟喪屍片都應該要回歸B Movie懷抱。
網上圖片
好多歐美喪屍片都會同歷史事件或者人物結合，最多人拍過嘅應該係喪屍加德國納粹，例如挪威嘅《Dead Snow》系列、荷李活嘅《大君主之役》，兩部都係關於納粹德軍搞人體實驗，製造喪屍變成殺人武器。喪屍成為獨裁政權嘅殺人工具，變成加害人民嘅爪牙。唔知香港電影人敢唔敢挑戰喪屍克警呢個題材？
