【圍棋版賭神】《神之一手：鬼手》權相祐棋盤生死決 因乜解究捉棋會死人？
一子錯唔止滿盤落索，仲會魂斷棋盤，只因用生命作賭注。
網上圖片
講起圍棋相信大家都會諗經典動畫《棋靈王》，或者AlphaGo。喺《棋靈王》入面，主角佐為係一個日本平安京時代嘅皇室棋士，畢生就係為左成為棋神而追求圍棋最精妙嘅一着「神之一手」，甚至因為太執着到死後化成棋魂都要追求呢目標。最近韓國電影《神之一手：鬼手》就係少數以圍棋做題材嘅作品，呢部戲以地下圍棋賭局世界為背景，劇情牽涉黑幫仇殺、嚴刑逼供等等嘅大量血腥情節，絕對唔係坐定定捉棋咁簡單。
網上圖片
《神之一手：鬼手》其實係《神之一手》嘅前傳，由《天國的階梯》男星權相祐飾演主角「鬼手」，劇情講述鬼手喺殘酷嘅地下圍棋世界，佢因為圍棋而失去家姐同師傅，佢為左報仇而刻苦訓練，仲會以生命作賭注，同敵人展開生死較量嘅棋局。
網上圖片
為左追求真實感，劇組專登揾左韓國職業棋金善浩三段做圍棋顧問，佢用兩個月教演員捉圍棋，話唔戲中一班演員都變左圍棋高手。導演李健就表示，呢部作品以圍棋對決為敘事中心，佢希望將棋局營造到一種好似武俠電影嘅緊張氣氛，令到圍棋成為一個活生生嘅世界同動作片嘅舞台。
網上圖片
男主角權相祐除左要練圍棋之外，因為要應付大量動作場面，所以要操肌減磅，拍緊戲嘅時候只可以食番薯充飢。戲中所有動作場面都係親自上陣，冇用替身。佢仲上埋綜藝節目《認識的哥哥》，展示訓練成果，喺節目入面表演雙節棍。
網上圖片
至於上集《神之一手》係2014年嘅作品，由型格男星鄭雨盛主演。故事關於圍棋高手太石參加一場地下棋局，畀黑社會屈佢謀殺而坐冤獄，好彩坐監嘅時候有貴人相助，學識搏鬥技巧又增進棋力，放監之後決心要鏟除成個黑社會字頭。但係太石嘅復仇大計會顛覆成個地下圍棋賭搏事業，但係佢不惜一切都要報仇雪恨，以眼還眼！
網上圖片
《神之一手：鬼手》11月7日會喺韓國上畫。
