占士甸逝世65年被CGI技術復活主演越戰片 原來仲有其他巨星「被復活」
咁樣真係好咩 ?
網上圖片
特效回春已經成為荷李活電影嘅潮流，例如李安新作《雙子任務：疊影危機》就成功令後生版韋史密夫同而家嘅韋密夫同台演出，喺呢個回春技術啱啱推出嘅時候，好多人預計會用呢個技術復活過生嘅巨星，等佢地重返大銀幕。而家第一個復活嘅巨星就係喺1955年因為車禍而過生嘅占士甸，當年佢只有24歲。
網上圖片
電影公司Magic City Films宣布成功向占士甸嘅屋企人拎左影像使用，佢將會喺越戰電影《Finding Jack》「擔任」第二男主角。
網上圖片
占士甸係一道荷李活嘅流星，一生主演過三部電影，佢喺《蕩母痴兒》（台譯：《天倫夢覺》EAST OF EDEN）嘅反叛少年形象震撼全球影迷。另外兩部嘅《阿飛正傳》（Rebel Without a Cause）、《巨人》（Giant）同樣經典，可惜佢拍完《巨人》之後就驟然辭世。
網上圖片
雖則占士甸過生之後先爆發越戰，但係科技可以改變一切，佢都可以復活重返銀幕打越戰。《Finding Jack》導演Anton Ernst表示，占士甸嘅家人當呢部戲係佢嘅第四部主演電影，監製保證製作團隊一定唔會令觀眾失望。
網上圖片
《Finding Jack》改編自同名小說，講述喺越戰即將完結嘅時候，有過萬隻軍犬畀軍隊畀美國政府介定為「剩餘軍用物資」，亦即係話佢地會留喺越南做狗肉。主角決違抗軍令，同佢隻軍犬Jack一齊展開旅途。而家暫時仲未知由邊位演員擔正，只係肯定占士甸會係第二男主角，到時佢嘅對白會揾其他演員去配音。
科技越嚟發達，好多已故巨星都可以返生重現幕前，之前有日本廣告成功復活柯德莉夏萍，雖然得分半鐘，但都已經相當震撼。
