【Netflix新戲】《鬼影特攻：以暴制暴》 米高比爾爆炸回歸
以暴制暴係惟一對付惡勢力嘅方法。
網上圖片
Netflix近幾年都會喺大時大節上架原創大製作嘅電影，2017年有韋史密夫主演嘅科幻片《光靈》(Bright)、上年就有珊迪娜布洛主演嘅驚悚片《蒙上你的眼》。今年又就嚟聖誕節，唔單止有馬田史高西斯嘅重炮作品《愛爾蘭人》，仲有強勢重返銀幕嘅導演米高比爾執導，「死侍」賴恩雷諾士主演嘅《鬼影特攻：以暴制暴》。
網上圖片
Netflix最出名嘅係分析用戶嘅數據，佢地有特別嘅技巧知道觀眾想要啲咩，雖然好多用家都唔覺得Netflix嘅數據係啱。不過事實上人人都勁插嘅《光靈》，上架三日就有1100萬個用戶睇過，《蒙上你的眼》一個星期就有4500萬個用戶睇過。就算韋史密夫同埋珊廸娜布洛而家唔夠以前紅，但係觀眾仲係一樣咁鍾意佢地。因為有呢兩部作品嘅往績，所以拍爛左《變形金剛：終極戰士》嘅米高比爾喺Netflix得到重生嘅機會。
網上圖片
《鬼影特攻：以暴制暴》嘅劇情講述六個好打又有錢嘅靚仔靚女，佢地扮自己已經死左，但其實暗地裏四圍警惡懲奸，私了壞人。
網上圖片
六位鬼影義士之間係用數字互相稱呼：賴恩雷諾士飾演一號、《希魔撞正殺人狂》美蘭妮羅蘭飾二號、《七俠蕩寇誌》墨西哥男星馬尼加斯魯夫飾演三號、Adria Arjona飾演四號、Corey Hawkins飾演五號、班哈迪飾演六號。
網上圖片
電影仲有《非常盜》戴夫法蘭高、伊朗男星Payman Maadi、以色列演員Lior Raz等人參與演出。淨係睇演員陣容就發現到《鬼影特攻：以暴制暴》嘅劇組相當國際化，相信係要配合「鬼影特攻」橫行世界鋤強扶弱嘅特性。
網上圖片
《鬼影特攻：以暴制暴》去左全球各地取景，包括：喺阿拉伯阿布扎比拍攝一個月、喺意大利佛羅倫斯、羅馬同錫耶納取景。呢部電影拍左四個月，超過一半時間喺全球各地取景，可想而之成本幾咁驚人。
網上圖片
既然講明係賀歲大作，Netflix自然發揮佢地嘅金礦實力，無上限泵水拍戲。而家睇落個勢Netflix似乎係想長期留住米高比爾幫佢地拍戲，佢地打算將《鬼影特攻：以暴制暴》發展成系列電影。原本英文片名只係叫「6 Underground」，但係中文戲名硬係要加返個冒號喺後面，遲啲可能會拍《鬼影特攻：變形金肛》之類嘅續集。
米高比爾喺拍《變形金剛》嗰陣都已經環遊世界，通常喺海外拍嘅作品都可以喺取景國家拎到唔錯嘅票房。Netflix喺全球有1.6億用戶，目前仲積極開拓全球市場，所以佢地同米高比爾非常啱咀形。
網上圖片
原本Netflix只係諗住用1億美金預算，點知後越拍越多錢，由1.2億變成1.5億美金，估計係Netflix史上最高製成本嘅電影。《光靈》預算9千萬，《愛爾蘭人》為左要羅拔迪尼路同阿爾柏仙奴回復青春而洗左1.2億美。《鬼影特攻》嘅預算仲要包埋賴恩雷諾士嘅極高人工，佢嘅片酬係2700萬美金，令到佢成功擠身荷李活嘅高片酬榜入面，仲可以喺四個月嘅拍攝期去世界各地旅行。
網上圖片
表面上睇落1.5億好似好多咁，但係米高比爾拍開大製作，對於佢嚟個只係散紙。2007嘅《變形金剛》係成個系列拍得最平，「剩係」用左1.5 億美金。《鬼影特攻：以暴制暴》成功令米高比爾再次有發揮空間，佢之前同堆機械人搏鬥左十年，就算佢喺呢十年時間入面拍左套評價唔錯嘅《13小時：班加西無名英雄》都好，但就咁要佢退出影壇似乎有啲可惜。始終人地唔係拍開科幻片，《重案夢幻組》、《石破天驚》呢類充滿槍戰爆破嘅電影先係佢嘅拿手好戲。
網上圖片
不過，今時今日嚟講，就算係《重案夢幻組》呢類嘅荷李活電影都未必會有好票房，因為而家嘅觀眾口味由槍戰動作片轉移到超級英雄片。米高比爾呢類專講爛gag、物化女性、諷刺性小眾嘅搞笑路線，仲要加埋仲誇張過超級英雄片嘅爆破動作場面，似乎老土左啲。但係，大家都唔可以忘記米高比爾係「爆炸」始祖，佢係頭一批令到「爆炸」成為電影要角嘅導演。
喺《重案夢幻組2》入面，米高比爾堅持唔用CGI，用左五萬加侖汽油同一大堆雷管引信，炸到一楝4000萬美金豪宅變成灰，最重要呢段爆炸場得十五秒。拍完呢段戲之後導演有咩諗法呢？「呢楝嘢值四千萬美金，佢好似紙牌屋咁樣冧左。」就係咁簡單，唔會話咩「應該要拍長啲」、「炸爛左好可惜」。對於米高比爾嚟講，爆炸就好似食飯飲水一樣咁平常。
網上圖片
《鬼影特攻：以暴制暴》係令到米高比爾做返自己嘅作品，有大量撞車、爆炸嘅場面，炸嘅範圍一定要夠大、夠靚、有歷史價值嘅建築。可能米高比爾一直都好想炸爛成個宇宙。除爆炸之外，連佢嘅獨特美學都返晒嚟，例如上面呢幅電影海報都相當有米高比爾風格。相信係數一數二最肉酸老土嘅海報。
網上圖片
《鬼影特攻：以暴制暴》成套戲以4K畫質拍攝，務求要每個觀眾都可以睇到每一點火花同埋專程露出嚟嘅長腿。12月13日將會獨家上架Netflix，到時又可以一家大細圍埋一齊邊睇邊鬧，享受米高比爾帶嚟嘅歡樂時光。
