• U生活

【Marvel】黑寡婦TOP 10秘聞 原來佢已經係個阿婆？

2019年12月05日 03:42 pm

Leng Zai @ UPower

睇完電影記得睇返漫畫補完返人設。

黑寡婦喺MCU作品入面係個正義英雄，不過喺漫畫原著入面其實唔係完全正氣嘅角色。相比起MCU作品，似乎原著漫畫嘅黑寡婦更加立體。今次就分享十個關於黑寡婦「秘聞」，等大家睇睇原作嘅黑寡婦同MCU嘅分別。

1. 黑寡婦其實係個婆婆

其實黑寡婦喺1928年出世，喺三十年代尾入左蘇聯情報部門Black Widow Ops，佢同其他女仔畀人捉左入去俄羅斯嘅Red Room特訓兼洗腦。完成殘酷訓練之後，佢成為左一個起級戰士，組織派佢去暗殺忍者組織首領「The Hand」。之後美國隊長同狼人策反黑寡婦，等佢加入復仇者聯盟，於是佢成為左雙重間諜，調轉頭滲入返蘇聯陣營。

2. 黑寡婦同 Winter Soldier拍過拖

黑寡婦喺Red Room 嘅部份特訓係由Winter Soldier指導，訓練過程當中佢地兩日久生情。不過，冇乜任務做嗰陣，蘇聯將 Winter Soldier擺去急凍倉庫入面，逼佢進入低温凍眼嘅狀態。而黑寡婦就被逼嫁左一個蘇聯試飛員。

3.黑寡婦記憶係假嘅

根據漫畫一開頭嘅設定，黑寡婦細細個係個芭蕾舞團團員。但係同佢自細就幫蘇聯政府做嘢嘅背景唔同，有人分析黑寡婦同狼人一樣畀人植入過假記憶，包括佢以前係個是芭蕾舞演員嘅設定。MCU明顥喺呢個設定拎到靈感，喺《復仇者聯盟2：奧創紀元》入面研究「黑寡婦記憶」。喺佢嘅記憶入面，到底有邊啲真，邊啲假呢？

4.鷹眼學壞，只因黑寡婦

喺漫畫入面，仲係蘇聯間諜嘅黑寡婦引誘鷹眼一齊聯手暗殺美國隊長同其他超級英雄，不過之後黑寡婦唔小心鍾意左鷹眼，搞到想叛變向美國投誠。蘇聯知道左就梗係要殺死黑寡婦，跟住鷹眼就救左受重傷嘅黑寡婦。送左佢去醫院之後，鷹眼決定彌補過去嘅錯，於是加入左復仇者聯盟，之後仲帶埋黑寡婦入去。

5. 做Fashion嘅黑寡婦

喺1970嘅《夜魔俠》（Daredevil）漫畫入面，夜魔俠同黑寡婦搬去洛杉機一齊住，夜魔俠都係冇乜點變，日頭做律師，夜晚換戰衣對付敵人。不過黑寡婦就要做左時裝設計師。雖然喺呢個版本嘅黑寡婦結左婚，但佢都唔會放棄自己嘅使命，照樣警惡鋤奸。

6.有好多個黑寡婦 ?

蘇聯一直都發展「黑寡婦計劃」屢，不停用盡一切方法都訓練出最多數量嘅超級士兵，所以喺Red Room有好多小朋友受訓，黑寡婦只係其中一個。其中一個女仔叫 Yelena Belova，佢完成訓練之後就仆心仆命為組織效力，用盡全力都要證明自己好過黑寡婦。但係黑寡婦一早已經知道自己只係黨嘅一隻棋，完全了解共產黨嘅手段，所以最後投誠復仇者聯盟。

7.黑寡婦真係寡婦

喺原著漫畫Ultimate Marvel版本，黑寡婦嫁左Alexi Shostakov，表面上嘅佢係一個試飛員，喺一次火箭試射嘅嗰陣遇到爆炸意外死左，於時黑寡婦就全心投入練。但實情係，Alexi Shostakov係冇死到，佢仲做埋超級英雄紅衛兵(Red Guardian)。之後紅衛兵同復仇者聯盟大戰  ( 呢個時候黑寡婦已經係成員之一 )，最後佢最後因為大樓爆炸死左，黑寡婦變左真寡婦。

8.殺左鷹眼個老婆同仔女

喺漫畫Ultimates版本，黑寡婦成為雙重間諜，佢同洛基一齊密謀統治世界。為左實現「理想」，佢不惜殺左鷹眼嘅老婆仔女。當然，喺MCU《復仇者》系列從來冇提過黑寡婦嘅黑暗一面，未知新作嘅獨立電影會唔會向觀眾展示暗黑版黑寡婦。

9.可能係皇室成員

黑寡婦真名叫Natalia Alianovna Romanova，原來佢個名係源自俄羅斯羅曼洛夫皇朝，相信係參考左沙皇尼古拉斯羅曼洛夫。《變種特攻》嘅作者Chris Claremont 創作左一個故事，係關於黑寡婦畀美國隊長同狼人營救嘅過程。佢畀忍者組織首領「The Hand」捉左，對方都暗示佢同尼古拉斯其實有血緣關係。

「The Hand」想向黑寡婦洗腦，佢地想用「羅曼諾夫」姓氏嘅人去摧毀共產黨。羅曼諾夫係皇室嘅姓氏，而且其實都唔係好多姓羅曼諾夫，所以黑寡婦好有可能係皇室成員。不過狼人同美國隊長唔會等敵人講完家族史，打低啲忍者救人先再算。

10.黑寡婦強度已經到達人類顛峰

喺MCU作品系列入面，黑寡婦極之好打又醒目，但係咁多集入面都冇提到佢喺Red Room入面得到咩能力，遲啲佢嘅獨立電影一定會完全披露未知身世。其實，同美國隊長一樣，都係注射左超級士兵血清，惟一分別係蘇聯製。黑寡婦嘅速度、反應、同敏捷程度都已經去到人類極限，如果再快啲的話就拍得住超人。當然槍炮子彈都係會傷到佢，亦都會死。不過佢身體復原能力同抵抗力都係人類頂峰。而且血清會令人變得長命，所以就算黑寡婦喺1928年出世都好，個樣仍然係咁後生。