【巴西動漫節】《神奇女俠1984》首爆預告 熱情影迷險推倒「死侍」

Leng Zai @ UPower

Marvel永恆族眾神亮相~

最近巴西聖保羅舉行一連四日嘅動漫節,之前就請左Marvel電影公司總裁奇雲費格(Kevin Feige)去宣傳《永恆族》(Eternals)、「死侍」賴恩雷諾士(Ryan Reynolds)就為新作《爆機自由仁》(Free Guy)造勢、《星球大戰:天行者崛起》(Star Wars: The Rise of Skywalker)嘅台前幕後都一齊現身,而且仲公布埋《神奇女俠1984》嘅第一條正式預告,令現場嘅FANS大飽眼福。

DC英雄片導演演柏蒂鎮堅斯(Patty Jenkins)同埋女主角姬加鐸(Gal Gadot)原班人馬再炮製續作《神奇女俠1984》(Wonder Woman 1984),將會喺出年六月上畫,姬加杜喺巴西動漫展正式公開預告之前,就搶閘喺社交平台上載左16秒嘅精華,可謂「預告嘅預告」。

網上圖片

喺今次嘅預告可以睇到,神奇女俠用左兩大神器:真言套索、神力手鐲去打低敵人。但係,今集做反派「豹女」(Cheetah)嘅姬絲汀域(Kristen Wiig)就未有亮相,反而上集已經死左嘅的《星空奇遇記》男星基斯派恩(Chris Pine)今集竟然返生,留低一個謎團。

網上圖片

至於Marvel都唔執輸,奇雲費格帶左MCU第四階段嘅頭炮,《永恆族》嘅預告出場,雖然只係冇剪過嘅粗粒版,但係影迷睇到安祖蓮娜祖莉(Angelina Jolie)飾演嘅神族女武士Thena嘅動作場面都已經夠晒開心。《永恆族》會喺出年11月上畫。

喺動漫節開始之前,有影迷估Marvel會宣布拍《死侍3》,結果係咩聲氣都冇。反而「死侍」賴恩雷諾士最新嘅主演作品,由《翻生侏羅館》桑勒菲(Shawn Levy)執導嘅《爆機自由仁》(Free Guy)就有喺現場宣傳,一班影迷見到雷諾士就極度興奮,好多人仲企起身拍手掌,佢都相當主動落台同影迷打招呼回禮,搞到現場氣氛勁high,仲有日推跌圍欄,嚇到「死侍」彈返上台。

網上圖片

《爆機自由仁》講述雷諾士飾演一個網上遊戲嘅NPC角色,有日突然發現自己其實可以拯救遊戲世界,結果改變宿命。雷諾士形容新作係現化版嘅《回到未來》,亦都係佢最鍾意嘅演出作品,估計出年會喺暑假上畫。

今年迪士尼嘅年度壓軸鉅作《星球大戰:天行者崛起》,一樣落足全力造勢宣傳,導演J.J.艾布斯(J.J. Abrams)帶埋一班主角包括黛絲烈尼(Daisy Ridley)、約翰保也加(John Boyega)及奧斯卡艾薩(Oscar Isaac)一齊出場,贏盡氣勢。黛絲就話可以參演《星戰》改變左大家嘅生活,同一班工作人員做嘢好開心。有人問導演今次最後一集,有啲咩驚喜帶畀大家?導演就話一個偉大嘅奸角會重現幕前。相信唔睇星戰都知係邊個。

網上圖片

Facebook Conversations