朱晨麗返蘇州同親人告別 回港唔做自私鬼：必定自我隔離
保護自己亦是保護別人～
近日新型肺炎疫情持續，內地確診人數不斷上升，本周二，本港更出現首宗死亡個案。正當響起健康警號人人自危時，原來朱晨麗曾秘密返蘇州鄉下過年，凝聚親情同時，爭取時間見最愛的婆婆最後一面，之後回港，近日又再度回蘇州奔喪！雖然犯險，但她親情大過天，一於無有怕，不過她強調回港後必定會自我隔離。
朱朱向來好愛錫老人家。
朱朱日後要幫婆婆負起照顧公公的角色。
日前朱晨麗於社交網上載了一對手的黑白相片，留言：「天使來把您接走了，我會嘗試習慣嘗試堅強……下輩子我們還做一家人！！！相信在天堂，我們會再遇見，等我！」對婆婆的離世，一字一淚！孝順女朱朱在新春期間去了蘇州送婆婆最後一程，不留遺憾。
朱朱年年都返鄉過年，蘇州探親回港後，近日又再度回蘇州奔喪！
今時今日作為大台姐仔，身驕肉貴的朱朱，為了親人，堅持北上冒險，沒有顧慮自身安全問題！她回覆《頭條日報》記者說：「多謝關心，大家唔使擔心我，因為我整個新年都留喺蘇州過，我冇出過街，要防護自己，亦保衛他人，仲可以藉此機會多啲陪吓屋企人，因為陪伴，係世上最昂貴嘅禮物！祝福大家新年快樂，幸福安康！」朱朱於疫情大爆發前已回港，但近日再度回鄉奔喪，但她表示為人為己，回港後必留在家中自我隔離。
她形容跟何廣沛是友誼以上，戀人未滿，究竟還欠甚麼呢？
年年長途跋涉回鄉過年的朱朱，其實過年前經已許下新年願望，望當時還未過身的婆婆早日康復，她有感而發說：「新年願望好簡單，希望婆婆精精神神，無論我幾忙都好，都希望抽到時間去探佢。本身媽咪成日來港陪我，爸爸間中會嚟，今年我叫佢哋唔使嚟，陪住婆婆先，因為婆婆先至係需要照顧嘅人。之前得兩日時間，我都返咗去一次，希望見多啲婆婆。老人家生命倒數中，作為後輩要珍惜每次見面時光，我由婆婆帶大，同佢比較close。」
難得回鄉，朱朱為親近婆婆多些，又為她剪腳甲，「可能機能問題令到佢嘅指甲既厚又硬，但又好脆弱，我都未同媽媽剪過指甲，但今次彎身幫婆婆剪腳甲，搞到條腰痛到伸唔直，但唔緊要，我好珍惜呢啲時光。」她又自爆未帶過緋聞男友何廣沛見老人家：「我比較傳統，覺得要去到結婚先會帶返屋企，我同佢係好熟，再次合作拍《大醬園》溝通係昇華咗嘅，不過，同佢嘅關係介乎喺『友誼以上，戀人未滿』，欠缺咗撻一聲，(咁要點先撻得着？) 呢啲由男仔諗，女仔要被動啲，(佢爭乜？)哈！爭timing啩。」
樣靚身材正的佘詩曼是朱朱偶像。
隨住劇集《多功能老婆》中演「十三點」闊太思蕾演技受讚賞，監製陳寶華更睇好朱朱必定上位兼爆紅，更是視后佘詩曼接班人，對此，朱朱開心說：「初入行時，啲人問我想唔想做嘉玲姐(劉嘉玲)第二？唔知點解我咁答：『我未必可以做到嘉玲姐第二，但我可以做朱晨麗第一！』所以呢句說話一路keep住喺心裏面，希望自己都好似佢哋成功之餘，都成為一個icon、榜樣，多啲人以我為榮。」
不少街坊拉住朱朱「集郵」，朱晨麗戲言大家只知道她角色名是馬思蕾，未必叫得出真名。
觀眾讚賞 《多功能老婆》中演「十三點」闊太思蕾，演技受讚賞。
網民洗版 《大醬園》中，朱朱同何廣沛在溪澗「鴛鴦戲水」，成為網民熱話。
上位朱朱有份拍王晶執導的電影版《倚天屠龍記》。
朱朱好欣賞劉嘉玲。
朱晨麗貴為11年港姐冠軍，穿水著look身材一流。
