• 天天有娛

江美儀著性感睡衣登爆笑舞台劇 白滑長腿鬥米雪香肩贏盡話題

2019年07月12日 05:22 pm

UP_PT @ UPower

觀眾睇到拍爛手掌、笑到碌地！

由夏雨、李司棋、米雪、江美儀、阮兆祥和劉錫賢等領銜主演的爆笑舞台劇《秘密》，近日在廣州舉行了巡演的第三站，反應十分熱烈；觀眾朋友除了大讚劇組有心思，為當地觀眾注入了不少廣東特有的情懷外，對於「老戲骨」雲集鬥晒演技亦讚嘆不已。

在新加坡贏盡話題的美儀姐，在廣州站再下一城，繼續以超火辣性感睡衣LOOK「瞓身」演出，加上胸前誇張至極的「陰影」，令現場觀眾拍爛手掌。美儀姐與米雪在戲中爭寵兼爭身家，除了大鬥性感，一個騷胸一個晒香肩外，更大鬥體力，其中一幕二人踩住高踭鞋單腳企「角力」的戲份，明顯少啲體力都搞唔掂。

問到二人為何腰力如此驚人時，美儀姐笑言其實最有體力的是夏雨，「你就咁睇，以為我同米記好辛苦，其實最辛苦嗰個係夏雨，因為佢唔單止要技巧地用一手扶住米雪隻腳，又要借個膊頭畀我借力，又要繼續專心做戲，好佩服佢可以一心二用。」

「成功搶焦女人背後的男人」阮兆祥亦是劇中「重心人物」，很多場口都與他有關，故此整整120分鐘的舞台劇，祥仔要在台上逗留足100分鐘，絕對是體力的考驗。問到祥仔演出時心口濕了一大片，是否消耗了太多體力的緣故時，祥仔搞笑謂：「嗰啲唔係汗嚟，係口水黎架！夏雨哥同米雪姐仲有美儀，分別都有床上戲，又激情，又搞笑，睇到我流晒口水！」