港人講「地」
上星期以華Dee開了個頭講填海，今個星期當然想繼續講地，這課題很大，其實小妹不敢認專家，不過將複雜的問題化作淺白文字是我希望做到的。
除了填海，最多人關注就是新界地。以前英國接管香港之時，清政府有交帶落英國政府要好好照顧在香港的中國子民，讓他們繼續正常咁生活，唔好難為佢哋，於是英政府亦沒有干預新界原居民幾百年來的傳統(但食咗佢哋啲地就有，有機會再講)，直至七十年代港英政府才將丁屋丁權制度化。
新界棕地（資料圖片)
棕地，簡單來說主要是祖堂地，由一班司理管理，可以收吓租咁，但一講到賣地，始終要地主親身同意，有好多地主可能已經年事已高，有的可能身處海外，最重要是未必全部有共識，點賣？
當有人提出要搞棕地起樓，不如先問自己，如果你想賣樓但層樓阿媽同老婆都有份，阿媽話唔想賣老婆又話要睇定啲，你層樓都冇可能賣得成。同樣道理，祖堂地當然可賣，要100%業權同意丫嘛！你住的屋苑有100%業主出來投票，理論上都可以改大廈公契架。實際上做不做到？有幾多屋苑，就連想取得三成業權份數來成立業主立案法團，都困難重重。何況棕地問題，簡直複雜過宇宙奧祕！宇宙奧祕都有個譜，有規律。但棕地，條條村、個個case都不同，仲要全球都冇乜相同案例，點做呢？
發展地產商手中的農地反較容易。( 資料圖片)
新界還有農地，如果是發展商持有的，反而最快最容易解決，只要申請更改土地用途，補補地價，就可以起樓。不過這類地的補地價問題唔止貴，樓價會轉嫁小市民，最煩係有人又指責政府官商鄉黑益發展商了。於是政府又諗公私營合作，或許有啲位可以起到成本低一些的房屋，但然後又有人跳出來說要耕田…看來最後還是搞填海算了，至少冇咁多人為因素丫嘛。
(利申：小妹是香港原居民，元朗鄧氏，因為係女兒所以乜都冇得分，於是絕對冇conflict of interest，哈哈！)
鄧銘心
** 博客文章文責自負，不代表本公司立場 **
