我三個禮拜生酮飲食之旅
我係一個170嘅肌肉型嘅女仔，大家都成日話好健康好fit，但其實自己都知脂肪比例都幾高，所以好想望落去再削啲鋼條啲。就係咁，從來無試過減肥的我決定試下生酮飲食(keto diet)。
咩係生酮飲食？
簡而言之，係一種低碳水化合物和高脂肪飲食，70%脂肪、25%蛋白質、5%低碳水化合物類，令我地嘅能量來源由平日從醣類攝取變成由脂肪攝取，從而燃燒脂肪，因此血酮濃度會提高。
第一個禮拜- trial and error
第一個禮拜嘅我好motivated，好快咁買左煙肉、牛油果、杏仁奶，因為佢地最易搵、最平。頭兩日，有少少餓咁，即刻無咗2公斤。（不過有研究就話頭一星期因為低碳，所以會脫好多水，就會輕啲）
屋企人一開頭係極度質疑哩件事，不過後尾佢地都嘗試支持我。但好搞笑嘅係，佢地整嘢食俾我嗰陣，無留意到食物真正嘅成份。例如，佢地係唔知道麥樂雞除左雞肉，仲有好多其他成份，好多碳水化合物㗎！仲有就係，雞胸係好健康，但因為佢脂肪含量太低，唔適合生酮飲食。
哩個禮拜簡直係同自己心理同埋屋企人嘅拉鋸戰！我成日都無乜精神，而且成日都燥燥哋。
最慘係！係嗰個星期六，去左一個船p，咁貪玩同天真嘅我就諗住食左carb blockers，飲啲酒食啲咖喱角會無事。第二日即刻重返1kg，勁大挫敗感！！！
第二個禮拜- Getting a hand of it
經過第一個禮拜嘅嘗試同教訓，我決定重整旗鼓，一係唔做，一做就應該做到最好！我download左計carbs嘅app，今次買定左成個星期嘅野食，確保係自己預備，唔會食到啲唔啱生酮嘅野食。今次啲食物多左：防彈咖啡、肉腸、核桃、羽衣甘藍。哩個星期就好堅定好平安咁渡過，輕左2kg。
屋企人都話我瘦左，我個饑餓感亦少左，但係就變左每晚都訓唔著。
另一個問題都衍生左：約唔到人食飯，來來去去都係食扒同炸雞，有時都幾唔好意思，同埋相對比較貴，搞到我有啲精神緊張，食咩之前都要查一查營養成份先。
第三個禮拜- it’s not you, it’s me
經過一翻深思熟慮，我覺得同keto係一種toxic relationship，佢係俾到某啲我想要嘅野我，但問題就係我唔開心。我參與唔到朋友嘅活動，成日好焦慮食得唔啱，又會炆炆地咁，所以決定只係keto最後一星期，嚟個last dance。
哩個星期都有試過整其他嘢食，用生菜包住：煙肉、莎樂美腸、火腿、煙肉、芝士，其實勁滿足勁好食，不過有啲貴。
就咁，我就輕多1kg，正式同keto分手。
總括嚟講
我最後係68.5-2+1-2= 65.5kg，輕左3kg，明顯瘦咗。其實你話我正式keto嘅話應該係得兩個星期，所以都算係咁啦？
keto都有好多好處嘅，根據網上 會減磅減體脂、精神好啲、對心血管方面好、又可以盡情食肥野:雞皮、鹹蛋黃炸魚皮，全部都係無任歡迎！
咁都有唔好處啦，其實網上都話應該要一至三星期先可以適應都keto，但我就停咗。我成日都好精神緊張、心情低落、打波嘅時候無乜力，但就無肚餓嘅，但好多想食嘅野都無得食咁。
我覺得我今次係預備得唔好嘅，無預計到出街食飯，屋企人食飯哩啲問題。所以，應該會有下次再挑戰嘅時候！不過最緊要，就係健康同開心，所以我依架都係投入返美食嘅懷抱先，遲啲再從長計議。
