衛詩雅首次睇NBA叫到聲沙：好驚球員救波衝埋觀眾席
誰說睇NBA是男生的專利，女生都一樣可以睇得肉緊！昨日（10月5日）NBA中國賽勇士對木狼於深圳舉行，衛詩雅（Michelle）就是被邀出席觀戰的坐上客之一，同坐的還有余文樂與前NBA球星易建聯。「第一次現場睇NBA，氣氛熱鬧過睇電視幾十倍！我都叫到聲沙，我哋坐第一行，連球員啲喘氣聲都聽到，不過真係好驚佢哋救波時停唔切衝埋觀眾席，肯定砸死我。」
原來Michelle開始睇NBA全因前男朋友是籃球健將，慢慢她亦愛上籃球比賽的刺激對戰，「男仔運叻一定加好多分。籃球比賽球來球往好精彩，今次Kevin Durant同Stephen Curry都好落力，另外希望可以同神級改圖王『黑人問號』Nick Young合照，但可惜失敗咗。」下場NBA中國賽將於10月8日移師上海，Michelle本來已找了機票兼酒店準備出發再觀戰，但最終因要飛到日本開拍新戲無法成行，「唔緊要，下次直頭去美國睇，一票難求都要搶飛睇！」
