【亞運】等足8年終上台單車大師兄高肇蔚忍淚踩決賽：我做到了

2018年08月28日 11:46 pm

亞運

吳家祺 @ UPower

高肇蔚，30歲，終於拿到首塊亞運獎牌。

本網記者攝

【UPower雅加達直擊】雅加達巨港亞運，高肇蔚、梁嘉儒、梁峻榮、繆正賢4子踩入男子團體追逐賽決賽，最後不敵中國隊得銀牌。然而，4子初賽踩出4分06秒085刷新香港紀錄，走到亞運舞台搏到盡，上頒獎台是最佳回報。

本網記者攝

4人之中，30歲的大師兄高肇蔚第3次參加亞運，終於等到機會上頒獎台領獎。台下的舊隊友陳振興山地興開心地為他拍照，他說終於見證到「肥高」上台一刻，喜見這位勤力的男兒終於修成正果。

梁峻榮（左起）、繆正賢、高肇蔚、梁嘉儒。本網記者攝

本網記者攝

等了又等，「肥高」加入香港單車隊12年，10廣州亞運他是後備無緣上台領獎，14年仁川因為單車機械故障錯失良機，18年終於踩出彩虹，走上亞運頒獎台。高肇蔚說：「等了8年，終於到我了。10年廣州亞運我是後備，睇隊友踩，14仁川因為單車機械故障無緣上台，終於等了8年成功了。」

本網記者攝

一直想上台，可有想過今次亞運非要上台不可?高肇蔚說：「我無畀咁大壓力自己。團體呢條路好難，好多強隊，但今次人地失手我哋穩定，去大型運動會都係需要咁樣。練習幾快無用，要睇比賽發揮，我們不是最快，但實在夠穩定。」

本網記者攝

男兒有淚不輕彈，不過高肇蔚表示知道踩入決賽的一刻，真的有衝動想「喊出來」：「想喊，入決賽個下真係想喊，但我要控制自己，因為下午仲要踩，要爭金牌。這樣的複雜情緒，在14年試過一次。那是第1次贏14年環馬來西亞分站冠軍，是單車生涯最開心一日，因為是第一次，真的好想贏獎牌。今次亞運獎牌是遲來，好遲，但值得。」

「有好多人話我傻，踩咁多年無好突出成績，都仲踩緊，但運動員就係咁的心態。運動員係明知不可為而為之，係咁硬頸，係咁執著，相信自己終於有一日會做得到。」帶著傻勁去踩，踩出一塊獎牌，「肥高」說這刻想起了單車聯會的朋友。

「好記得單車聯會的Alex在2010年同我講過一句話。當年亞運我無上，只是做後備看隊友踩，個時好失落想唔踩。佢同我講，我下一屆一定要睇住你攞牌，你唔好走呀。然後留了4年，14年亞運失手，又留4年。可能佢已經忘記咗呢句話，但我仍然記在心中，返去香港後要和他飲茶。」高肇蔚說。

本網記者攝

今屆來亞運會的香港運動員數目不少，大家都是經過艱辛練習才來到印尼，絕對不是專程來包尾，但幸運之神不可能眷顧所有人，否則獎項再多也不會夠分。

由無牌到有牌，「肥高」以自身經歷勉勵同路人說：「還是那一句，明知不可為而為之。可能年輕的你呢一刻做不到，但你相信自己終有一刻做到。可能有時會諗太遙遠啦，點可能做到，點可能上台攞牌? 但做運動員要有這種心態，好硬頸執著，一定要留在這裡，一定要做到。因為我覺得拿不到想要的結果就走，好似逃避，好似一個失敗者，我不想有咁的心態。」終於等到，「肥高」好想講一句：「雖然遲，但我終於做到了。」