• 體新聞

陳偉豪感慨疫情下球圈前景難料：每次危機都是洗牌機會

2020年04月24日 03:44 pm

GGWP @ UPower

爛牌有爛牌嘅打法，愈爛嘅牌愈要畀心機打。

世事循環不息。也許在很多香港人眼中，1992年的《家有囍事》是最經典的賀歲片，經典程度連黃百鳴自己也要在後來翻炒好多次。但也有人認為2002年的《嚦咕嚦咕新年財》才是經典，麻雀大俠劉德華以打牌喻人生，永遠態度行先。「牌品好、人品自然好」，「爛牌有爛牌嘅打法，愈爛嘅牌愈要畀心機打」，以上金句放到今時今日仍然合用。

如果以打麻雀來比喻香港球圈，2020年4月24日踏入「19對生日」的陳偉豪可以說是經常拿到一副好牌。無論在南華、香港隊，陳偉豪都是領軍人物，是繼顧錦輝之後本地最出色的華人中堅，這一點無容置疑，但這樣的人才在疫情大時代也要暫時和香港飛馬解約，仍然在等待新的機會到來。誠如偉豪所說，每一次危機都是一次洗牌機會，無論是2003年沙士或者2020年新冠肺炎，有危，就有機。

出道21年，陳偉豪踢過流浪、南華、夢想FC、飛馬，足球生涯經歷高高低低，來到今天和飛馬解約，但偉豪早已經在今季季前在球圈外找到一份文職工作，也有和友人推廣「足球小將」計劃走入校園接觸學生，在球場以外多留幾手準備，對於一個已經成家，有兩位小孩來說的男人是合理選擇。

身為球圈一員，眼看疫情之下隨時面對大變，到底來季有幾多隊作賽仍然未知。歷經2003年沙士時期，偉豪對眼前一切絕對不陌生：「事實上，03年沙士之前個季球市已經不好。快譯通唔搞、二合唔搞(2000/01球季之後退出)，球市差得好緊要，當年環境仲差過現在。兩支球隊季尾一唔玩，好多人即刻失業、轉行。」

沙士不是突然衝擊，事實沙士之前一年成個香港環境不好，快譯通、二合退出，球市提早衰退，最差時間那季甲組只得7隊(2001/02球季)。偉豪舉例，當年奧運隊好手朱兆基、李思明、梁智駒，在困境下去花花落班捱了一段時間，「3000蚊，踢花花，外面再搵工」，捱了一段，之後眾人才陸續轉去較好的球隊落班，最佳例子朱兆基去了晨曦，輾轉拿了五冠王(2004/05球季)。

不用前輩親口提醒，只要睜開雙眼看清楚，自然明白要生存從來不是易事，偉豪說道：「唔洗人哋講咁多，自己睇到，人哋原本搵到錢都突然冇波踢。不過有時最差的環境對年青球員也是好事，多些經歷人才會成長。很多人成日怨冇機會、冇得踢，事實上有機會你也要把握得到。一切事情不是理所當然，冇得踢，你點要求加人工？」

偉豪說，每一次危機都是洗牌機會，有位畀你上，你都要有能力先上到：「你有準備，咩環境都可以將件事影響減到最細。多一點經歷，是好事。洗牌淘汰一班人，又有一班人接上。自己望下環境，如果你在最差一刻都選擇做球員，你要做還有能力留下來的一個。」

無時無刻都有準備，偉豪考了地產牌，試過沙士期間帶人去見客，那時候將軍澳的兩房盛惠100多萬，17年後的今天要700至800萬，升幅快過坐火箭。也有一次偉豪帶客人去睇白沙灣獨立屋，「1000多至2000呎左右，當時900多萬」，客人還想講價，最後當然沒有成交，這些樓宇現在幾錢？2000萬至3000萬都有。

扯遠了。無論是踢足球還是做地產，偉豪說從來都要做好自己，做足準備：「97前，個個炒樓摩貨，經紀在街爭客。市場不好，總會淘汰一班人，汰弱留強。情況係壞，未必唔好。球圈一樣，就好似洗牌機會，就睇下第時洗唔洗到一副靚牌。」

陳偉豪的球員生涯，總算洗到一副靚牌。2007年4月19日，陳偉豪以破香港球員最高轉會費紀錄的40萬港元由流浪轉會南華，穿起15號球衣是懷念2003年車禍離世的前流浪隊友張耀麟。此後多年成為香港隊隊長、2009年亞協盃4強坐爆香港大球場、同年12月東亞運足球金牌成員，這些成就已經是香港足球史冊一部份。如果用打牌比喻，偉豪食親都係靚牌。

身高1米84，後防一夫當關，效力本地最Top球會南華8年，陳偉豪見過圈中各大高手，誠如打牌一樣，再好的牌也要食糊才算成功：「踢波叻的人係好多。你係一個好好球員，但重要比賽把握唔到，就係上唔到位。有一些二線頭、一線尾，他把握得到，就上到位。靠運氣，邊行都係。但如果你唔裝備自己食到個運，靠運氣唔可以靠一世。」

歷史不斷重演。03年沙士，2020肺炎，總會有人被淘汰，總會有人上位，這一刻副牌唔靚，唔等於你副牌一世都係爛牌。偉豪教路，如何在有墮性的情況之下警惕自己：「換個心態，即使唔做最好，你唔好做最尾個班。」

做最好個班，曾經陳偉豪和好拍檔李志豪是本地守將最好的兩位，連同門將葉鴻輝，一度成為南華及香港隊的後防鐵三角。偉豪說他和志豪當年的確特別合拍：「我頭槌頂贏鬼佬，志豪短速快過人，兩個行出來都有贏人哋的殺手鐧，外援未必贏到我哋，這就是我哋可以踢到現在的原因。你一定要搵樣嘢，係你特別好過他人。」

磨利刀，在各行各業都有用。現存的華人中堅，梁諾恆(25歲)、馮慶燁(27歲)、李毅凱(25歲)各有長短，都曾經入選香港隊，短期內可能還有謝家強(27歲)可以頂上，未來港隊中堅位置是不愁無人。偉豪說道：「細佬、燁仔勝在身體較強壯，阿凱用波能力好一點，但他們也要認清自己優點是否真的比別人好，是否可以有嘢贏到鬼佬。」能力可以練，更進一步是像上代守將前輩李偉文一樣，好技術又食腦，有閱讀球賽能力長踢長有。

那麼，解約之後，偉豪下一步如何，仍然想繼續踢嗎，是要挑戰和哥李健和踢到41歲掛靴嗎？這位長青樹說：「我仍未掛靴，仍在等待機會，只要能力ok，分配到時間，我想踢。」除了想踢，偉豪也想在書展期間出書，「會搵人代筆寫，盡量自己搞晒」。

球員生涯可能已經打到北圈，但既然還有能力打，這場牌局仍然可以繼續。誠如《嚦咕嚦咕新年財》所言，「摸咗幾年好牌，摸幾次爛牌有咩所謂，總有一日會好嘅。」只要你相信，只要繼續打，也許好牌就在前面等你。